गगन थापाको प्रधानमन्त्रीलाई प्रश्न : झलनाथ खनाललाई कुन कानुन अनुसार उपचार खर्च दिएको ?

काठमाडौं – नेपाली कांग्रेसका नेता गगन थापाले पूर्व प्रधानमन्ती झलनाथ खनाललाई राज्यकोषबाट उपचार सहयोग कुन कानुन अन्तर्गत दिइएको भनि प्रधानमन्त्री केपी शर्मा ओलीलाई प्रश्न गरेका छन । पूर्वस्वास्थ्य मन्त्री समेत रहेका थापाले सामाजिक सञ्जालमा धारणा राख्दै २०७५ सालमा बनेको कानुन उलंग्धन गर्दै ओलीले विदेशमा उपचार गर्न जाने उच्च पदस्थलाई उपचार सहयोग दिइरहेको थापाले आरोप लगाएका छन । उनले भनेका छन :
उच्च ओहदामा बसेकाहरूले विदेशमा उपचार गराउँदा स्वास्थ्य मन्त्रालयले सिफारिस गर्ने र मन्त्रीपरिषद्ले निर्णय गर्ने प्रचलन थियो।यो गलत छ भनेर कार्यविधि बनाएर रोक्ने प्रयास गर्‍यौँ र मन्त्रालयबाट एक जनाको पनि सिफारिस गरेनौँ। तर पनि प्रमको ठाडो प्रस्तावमा राज्यकोषबाट उपचार खर्च दिने काम रोकिएन।

कानुन नबनेसम्म यस्तो काम बन्द हुँदैन भन्ने ठानेर २०७४ सालमा ओली सरकारले ल्याएको जनस्वास्थ्य विधेयकमा मैले नै”प्रचलित कानुनमा जुनसुकै कुरा लेखिएको भए तापनि कुनै व्यक्तिलाई विदेशमा उपचार गर्नु परेमा सोको लागि लाग्ने खर्च नेपाल सरकारबाट उपलब्ध गराइने छैन”भन्ने संशोधन प्रस्ताव राखेँ।

यो संशोधन संसदले स्विकार्दै बनेको कानून २०७५/६/२ गतेदेखि लागूभयो।
कानुनले स्पष्ट भन्छ जहाँ जे लेखिएको भए पनि कुनै पनि व्यक्तिलाई सरकारको ढुकुटीबाट विदेशमा उपचार गरेको १ रुपैयाँ पनि तिर्न मिल्दैन।
प्रधानमन्त्रीज्यू अब भन्नुस् पूर्व प्रमको खर्च व्यहोर्ने निर्णय कुन कानुनमा टेकेर गर्नुभयो?