सरकारी चिकित्सकहरु समायोजन अध्यादेशविरुद्ध आन्दोलनमा

काठमाडौं – सरकारी चिकित्सकहरुले ‘कर्मचारी समायोजन अध्यादेश’ तत्काल सच्याउन दवाव दिँदै आन्दोलन सुरु गरेका उनीहरुले आइतबार स्वास्थ्य तथा जनसंख्या मन्त्रालय घेराउ गरेका छन् ।
आफूहरुको सेवा, सुविधा र बढुवासम्बन्धी प्रावधान कटौती हुने गरी सो अध्यादेश आएको भन्दै आन्दोलरत सरकारी चिकित्सक संघ, नेपालमा आवद्ध देशभरका चिकित्सकहरुले तत्काल सच्याउन माग गर्दै आइइतबार स्वास्थ्य तथा जनसंख्या मन्त्रालय २ घण्टा घेराउ गरेका हुन् ।
सरकारले राज्यको कुनै पनि नीतिगत निर्णय प्रक्रियामा चिकित्सकहरुलाई सहभागी नगराउने गरी सो अध्यादेश आएको भन्दै मान्य नहुने सरकारी चिकित्सकहरुको अडान छ ।
सरकारी चिकित्सकहरुले समायोजन प्रक्रिया स्वेच्छिक बनाउन पनि सरकारसँग माग गरेका छन् । आफूहरुको माग सम्बोधन नभए अस्पतालको आकस्मिकबाहेकका सबै सेवा बन्द गरेर आन्दोलन गर्न बाध्य हुने पनि चिकित्सक मण्डलले बताए ।
उनीहरुले सो अध्यादेश आफूहरुको माग बमोजिम नसच्चिए समायोजन प्रक्रियामा सामेल नहुने घोषणा पनि गरिसकेका छन् ।