सिएमसीको धरौटी जफत गर्ने पक्रिया थालेका छौं – खानेपानी मन्त्री

काठमाडौं–मेलम्ची खानेपानी आयोजनाको मुख्य ठेकेदार इटालियन कम्पनी सिएमसी काम छोडेर भाग्न खोजेपछि अब के गर्ने भन्नेबारे छलफल भइरहेको खानेपानी मन्त्री बिना मगरले जानकारी गराएकी छन् ।
आज संसदको अर्थ समितिमा बोल्दै मन्त्री मगरले आजै पनि कम्पनीसँग दोस्रो चरणमा छलफल भएको जानकारी दिइन् ।
काम नसकी इटाली भाग्न खोज्ने कम्पनीसँग संयमित भएर छलफल गरिरहेको उनले बताइन ।
साथै कम्पनीले नेपालका दुई बैकमा राखेको झन्डै ३ अर्ब रुपैयाँ धरौटी जफत गर्नका लागि पत्र पठाइएको पनि उनले जानकारी दिइन् ।
सिएमसीको इटालीमा रहेको मुख्यालय टाट पल्टिएपछि उनीहरु भागेर जान लागेकाले कम्पनीको मेनेजरसहितका अधिकारीलाई रोकिएको मन्त्री मगरले जानकारी गराइन् ।
यस्तै खानेपानी सचिव गजेन्द्र कुमार ठाकुरले जुलाई २०१३ मा सिएमसीसँग ७ अर्ब ७२ करोड मा ३ वर्षमा काम सक्ने गरि सम्झौता भएको जानकारी दिँदै हालसम्म ८ अरब ३६ करोड १२ लाख भुक्तानी दिएको बताए ।
ठाकुरले ठेकेदारको ३ अर्ब ५० करोड रकम सरकारको हातमा रहेको भन्दै कम्पनीले छोडे पनि सरकारलाई घाटा नलाग्ने बताए ।
हामीसँग बजेट अभाव नहुनाले सिएमसीले हात झिकेको अवस्थामा मन्त्रालयले फास्टट्रयाक विधिमार्फत अन्य कुनै कम्पनीलाई काम दिएर भए पनि मेलम्ची खानेपानी आयोजनाको काम समयमै सम्पन्न गर्ने ठाकुरले बताए।