आजदेखि मनकामना केबलकार तीन दिन बन्द हुने

काठमाडौं – मनकामना केबलकार तीन दिन बन्द हुने भएको छ। मर्मत सम्भारका लागि आज असोज २९ गतेदेखि आगामी कात्तिक १ गते बन्द गरिने भएको हो।

मर्मत सम्भारका साथै केबलकारको लठ्ठासमेत छोट्याउने कामका लागि असोज २९, ३० र कात्तिक १ गतेसम्म तीन दिन बन्द गर्न लागिएको मनकामना दर्शन प्रालिले जनाएको छ । केबलकार कात्तिक २ गतेबाट नियमित सञ्चालनमा आउनेछ।
गोरखाको सहिद लखन गाउँपालिकास्थित प्रसिद्ध धार्मिकस्थल मनकामना मन्दिर जाने दर्शनार्थीलाई सहजताका लागि विसं २०५५ मङ्सिर ८ गतेदेखि मनकामना केबलकार सञ्चालनमा ल्याइएको थियो।केबलकारको प्रवेशद्वार ‘बटम स्टेशन’ भने चितवनको इच्छकामना गाउँपालिका ४ चेरेसमा छ।