निर्वाचन परिणामले कांग्रेसलाई धक्का : मुख्य पदाधिकारी नै संकटमा

काठमाडौं – हालै सम्पन्न आम निर्वाचनको प्रारम्भिक परिणामले नेपाली कांग्रेस लाई ठूलो धक्का दिएको देखिएको छ। विभिन्न निर्वाचन क्षेत्रबाट सार्वजनिक भइरहेको मतगणना परिणाम अनुसार पार्टीका प्रमुख नेताहरू नै पराजित हुने अवस्थामा पुगेका वा पछि परिरहेका छन्।
विशेष महाधिवेशनबाट सभापतिमा निर्वाचित भएका गगन थापा पनि आफ्नो निर्वाचन क्षेत्रमा मतगणनामा पछि परिरहेका छन्। घोषित मतपरिणाम अनुसार उनलाई राष्ट्रिय स्वतन्त्र पार्टीका अमरेश कुमार शिंहले कडा चुनौती दिएका छन्।
यसैगरी पार्टीका महामन्त्री प्रदिप पौडेल समेत चुनावी प्रतिस्पर्धामा पराजित भएको खबर आएको छ। त्यस्तै अर्का प्रभावशाली नेता गुरुराज घिमिरे पनि निर्वाचनमा हार व्यहोरेका छन्।
पार्टीका शीर्ष तहका नेताहरू नै चुनावमा कमजोर देखिन थालेपछि कांग्रेसभित्र परिणामको गम्भीर समीक्षा हुनुपर्ने आवाज उठ्न थालेको छ। विश्लेषकहरूका अनुसार जनतामाझ पार्टीको प्रभाव घट्दै गएको संकेत यस परिणामले देखाएको छ।
मतगणना अझै जारी रहेकाले अन्तिम परिणाम आउन बाँकी भए पनि प्रारम्भिक नतिजाले कांग्रेसका लागि चुनौतीपूर्ण संकेत दिएको बताइएको छ। निर्वाचन परिणामले आगामी दिनमा पार्टीको रणनीति र नेतृत्वबारे पुनः बहस सुरु हुने सम्भावना समेत देखिएको छ।