धनुषामा व्यवसायी र प्रहरीबीच झडप

धनुषा– धनुषाको विदेह नगरपालिकास्थित तिनकौरीया चोकमा स्थानीय व्यापारी र प्रहरीबीच आइतबार झडप भएको छ।
पान पसलमा आगलागी भएको घटनाको विरोधमा स्थानीय व्यवसायी र बजार व्यवस्थापन समितिले सडक अवरूद्ध पारेर प्रदर्शन गर्ने क्रममा झडप भएको हो।
झडपमा एकजना प्रहरी र एकजना स्थानीय घाइते भएको जिल्ला प्रहरी कार्यालय धनुषाले जनाएको छ। शनिबार राति साढे ११ बजे स्थानीय सन्तोषकुमार मण्डलको शान्ता पान पैलेसमा आगलागी भएको थियो ।
प्रहरीले लापरबाही गरेको र नगरपालिकाले बजारमा सिसिटिभी जडान नगरेकाले घटना भएको भन्दै स्थानीयले बिहानैदेखि नगरपालिकाका मेयर बेचन दास र प्रहरी विरूद्ध टायर बालेर प्रदर्शन गरेका थिए। स्थितिलाई नियन्त्रणमा लिन प्रहरीले अश्रुग्याँस पनि प्रहार गरेको छ ।
अहिले आन्दोलनकारी, नगरपालिका र प्रहरीबीच छलफल चलिरहेको छ।