काठमाडौं प्रहरी र अपराध महाशाखाको नयाँ अत्याधुनिक भवन निर्माण सुरु

काठमाडौं – काठमाडौं प्रहरी परिसर र महानगरीय अपराध महाशाखाको नयाँ भवन बन्ने भएको छ ।
आज महानिरीक्षक सर्वेन्द्र खनालले काठमाडौं प्रहरीका लागि भद्रकाली र टेकुमा महाशाखाको अत्याधुनिक भवन निर्माण कार्य शिलान्यास गरेका छन् ।
२०७२ सालमा गएको भूकम्पबाट हनुमानढोकास्थित कार्यालय भवनमा क्षति पुगेपछि प्रहरीका दुई निकाय टेकुस्थित नेसनल साल्ट ट्रेडिङको जग्गामा सारिएका थिए ।
अब भवन निर्माण भएपछि प्रहरीले अत्याधुनिक ठाउँबाट सेवा प्रवाह गर्ने महाशाखाले जनाएको छ ।
महाशाखालाई हाल बसेकै ठाउँमा १० रोपनी जग्गा सरकारले उपलब्ध गराएको छ । भद्रकालीमा रहेको नेपाल खाद्य संस्थानको १५ रोपनी जग्गामा कार्यालय भवन निर्माण थालिएको छ ।
भवन निर्माणसँगै अस्थायी संरचना पनि तयार गरेर भद्रकालीबाटै सेवा प्रवाह थाल्ने प्रहरीको योजना छ । प्रि–फ्याबबाट ती संरचना तयार हुने बताइएको छ ।
जग्गा खरिदका लागि सरकारले काठमाडौं प्रहरी परिसरलाई एक अर्ब २० करोड र महशाखालाई ६७ करोड निकासा गरेको थियो ।