लुक्लामा विमान दुर्घटना हुँदा को–पाइलट र एक प्रहरीको मृत्यु, तीन घाइते

काठमाडौँ — लुक्लाबाट रामेछाप आउँदै गरेको समिट एयरको जहाज दुर्घटनामा कोपाइलट र एक प्रहरीको मृत्यु भएको छ । पाइलटसहित तीनजना गम्भीर घाइते छन् । लुक्ला विमानस्थलमा आइतबार बिहान समिट एयरको जहाज धावनमार्गबाट चिप्लिएर दुर्घटनामा परेको हो।
त्रिभुवन विमानस्थलका अनुसार जहाजका कोपाइलट सुदीप ढुंगाना र विमानस्थल सुरक्षामा रहेका प्रहरी सहायक निरीक्षक रामबहादुर खड्काको मृत्यु भएको हो।
दुर्घटनामा उक्त जहाजका क्याप्टेन रवीन्द्र रोकाया, मनाङ एयरको हेलिकप्टरका पाइलट चेत गुरुङ र एक प्रहरी गभ्मीर घाइते छन्। उक्त जहाजकी एयर होस्टेज रश्मी लामा सामान्य घाइते छिन्। घाइतेहरुलाई उपचारका लागि काठमाडौं ल्याइएको छ।