सरकारी अस्पतालमा कार्यरत देशभरका डाक्टरद्वारा आकस्मिक बाहेकका सेवा बहिष्कार

काठमाडौं – आजबाट सरकारी अस्पतालमा कार्यरत देशभरका डाक्टरहरुले आकस्मिकबाहेकका सबै सेवा बहिष्कार गरेका छन् । यता डाक्टरहरुको आन्दोलनका कारण बिरामीहरु मर्कामा परेका छन् ।
काठमाडौंका वीर, टिचिङ, कान्ति, ट्रमा सेन्टर, टेकुलगायतका अस्पतालहरुले ओपीडीको टिकट काटेका छैनन् । उपत्यका बाहिरका अस्पतालहरुमा पनि आकस्मिकबाहेकका सेवा ठप्प छ ।
कर्मचारी समायोजन विधेयकको विरोध गर्दै सरकारी चिकित्सक संघले चरणबद्ध आन्दोलन गर्दै आएका छन् । सबै सरकारी डाक्टरहरुलाई संघ मातहत राख्नुपर्ने माग उनीहरुको छ ।
देशभर करिब १४ सय सरकारी डाक्टर छन् । उनीहरुले स्वास्थ्य सेवा दिवस मनाउने आजको कार्यक्रम पनि बहिष्कार गरेका छन् । स्वास्थ्य मन्त्रालयको तथ्यांक अनुसार देशभरमा केन्द्रिय, प्रदेशस्तरका, जिल्ला स्तरका र स्थानीय तहका गरी १ सय ६० अस्पताल छन्। यसका साथै २ सय २ वटा प्राथमिक स्वास्थ्य केन्द्र र झण्डै ४ हजार स्वास्थ्य चौकी रहेका छन्। सबै गरेर देशभर ४ हजार २ सय ८२ स्वास्थ्य संस्था छन्।