बुढीगण्डकी बाढी : हाल सम्मको क्षति विवरण यस्तो छ

गोरखा बुढीगण्डकी बाढी थप अपडेट: पुल र घर बगायो, १८ जनाको उद्धार

असोज २५ गते बिहान ५:३० बजे जिल्ला गोरखा चुमनुब्री गाउँपालिका-६, लोक्पा र चुम्लिङको बीचमा रहेको सिरिङ्गे हिमालमा हिमपहिरो गई स्थानीय उइनगुलुङ खोला थुनिएपछि बुढीगण्डकी नदीमा ठूलो बाढी आएको छ । बाढीले विभिन्न स्थानमा घर, झोलुङ्गे पुल तथा मोटरेबल पुलमा क्षति पुर्‍याएको छ भने १८ जना नेपाली नागरिकलाई सुरक्षित स्थानमा उद्धार गरिएको छ ।
हिमपहिरोका कारण नदीमा बाढी आएको खबर प्राप्त हुनासाथ प्रहरी चौकी सिर्दिबासबाट र प्रहरी चौकी चुनचेतबाट प्रहरी टोली परिचालन गरिएको थियो । नदी तटीय क्षेत्रमा रहेका प्रहरी युनिट तथा स्थानीयलाई सतर्क गराइएको थियो ।
बिहान ०६:१५ बजेदेखि नदी थुनिएको स्थानबाट पानी बग्न सुरु भई ठूलो बाढी आएको थियो । नदी तटीय क्षेत्रका बासिन्दालाई सुरक्षित स्थानमा सार्न इलाका प्रहरी कार्यालय आरुघाटबाट प्रहरी निरीक्षक अनिल श्रेष्ठको कमान्डमा २५ जनाको टोली खटिएको थियो ।
बाढीबाट भएको क्षतिको विवरण
१. चुमनुब्री गाउँपालिका-३, न्याकचेत: न्याकचेतदेखि सिर्दिबास जोड्ने पुरानो झोलुङ्गे पुल बगाएको छ ।
२. चुमनुब्री गाउँपालिका-३, सिर्दिबास: स्थानीय रामबहादुर गुरुङको एउटा कच्ची घर बगाएको र अर्को घरमा बाढी पसेको छ ।
३. धार्चे गाउँपालिका-५, माछिखोला: माछिखोलाबाट केरौजा जोड्ने झोलुङ्गे पुल बगाएको छ ।
४. धार्चे गाउँपालिका-५, माछिखोला: तल्लो बस्तीका ५/७ वटा घर र ५/७ वटा टहरामा बाढी पसेको छ ।
५. चुमनुब्री गाउँपालिका-३, सल्लेरी: २०/२२ वटा घर जोखिममा परेका छन् ।
६. आरुघाट गाउँपालिका-२ र ३ जोड्ने सोतीस्थित स्थान: फलामे मोटरेबल पक्की पुल बगाएको छ ।
७. चुमनुब्री गाउँपालिका-३, सल्लेरी: निर्माणाधीन सहज ऊर्जा पावर हाउस तथा आसपासका ७/८ वटा घर बगाएको छ ।