सर्वोच्चमा सिफारिस भएका न्यायाधीशद्वय चुडाल र सुवेदीविरुद्ध सुनुवाई समितिद्वारा उजुरी आह्वान

काठमाडौं – संसदीय सुनुवाई समितिले सर्वोच्च अदालतको न्यायाधीशमा सिफारिस भएका कुमार चुडाल र नहकुल सुवेदीविरुद्ध उजुरी आह्वान गरेको छ । फागनु २८ गते बसेको न्याय परिषद् बैठकले उच्च अदालत पाटनमा कार्यरत चुडाल र उच्च अदालत सुर्खेतमा कार्यरत सुवेदीलाई सर्वोच्चको न्यायाधीशमा सिफारिस गरेको थियो ।

आज बसेको संसदीय समितिको बैठकले दुवैजनाविरुद्ध १० दिनभित्र उजुरी दर्ता गराउन आह्वान गरेको हो । उजुरी आह्वानको सूचना बिहीबार जारी हुनेछ ।

उच्च अदालत पाटनका मुख्य न्यायाधीश डा. कुमार चुडाल र उच्च अदालत सुर्खेतका मुख्य न्यायाधीश नहकुल सुवेदीलाई सर्वोच्च अदालतमा न्यायाधीशका लागि सिफारिस  भएका छन् । नेपालको संविधानको धारण २९२ तथा न्याय परिषद्को ऐन २०७३ को दफा ६ बमोजिम संसदीय सुनुवाइ भएपछि नेपालको संविधानको धारा १२९ बमोजिम राष्ट्रपति समक्ष नियुक्तिका लागि उनीहरुको सिफारिस गरिनेछ ।