गोरखामा दुध बेच्न हिँडेकी मनमायाको टिपरको ठक्करबाट मृत्यु

गोरखा – टिपरको ठक्करबाट गोरखा नगरपालिका–१० अमलापानीकी ५२ वर्षीया मनमाया तामाङको मृत्यु भएको छ । बिहान ६ बजे दूध बेच्न भन्दै घरबाट नजिकैको छेपेटार बजारतर्फ गएकी उनलाई टिपरले ठक्कर दिएको हो ।

ठक्करबाट भुइँमा लडेकी मनमायालाई टिपरले ब्याक गरेर किचेर मारेको आरोप स्थानीयले लगाएका छन् । टिपरको ठक्करबाट मनमायाको घटनास्थलमै मृत्यु भएको हो वा होइन अनुसन्धान भइरहेको प्रहरीको जनाएको छ ।
ग १ ख ८०२७ नम्बरको टिपरले मनमायालाई किचेको जिल्ला प्रहरी कार्यालय गोरखाले जनाएको छ । बाक्लो कुहिरोको कारण बाटो राम्रोसँग नदेखेपछि टिपरले ठक्कर दिएको हुनसक्ने प्रहरीले जनाएको छ ।
प्रहरीका अनुसार मनमायाको मृत्युपछि आक्रोशित स्थानीयले क्रसरमा रहेका २० भन्दा बढि टिपरहरुको सिसा फुटाइदिएका छन् । यस्तै ६ वटा एक्साभेटर समेत तोडफोड गरेका छन् ।

टिपर चालक प्रहरीको नियन्त्रणमा र भीड नियन्त्रणको प्रयास भइरहेको डीएसपी खतिवडाले बताए । यतिबेला घटनास्थलमा व्यापक मात्रामा प्रहरी परिचालन गरिएको छ ।
क्रसर उद्योग बन्द नगरेसम्म मनमायाको शव नउठाउने स्थानीयवासीको अडान छ । घटनाबारे थप अनुसन्धान भइरहेको प्रहरीले जनाएको छ ।