मुख्यमन्त्री पोखरेल र चीनको कान्छु प्रदेशका गर्भनरबीच भेटवार्ता

बुटवल– प्रदेश नम्बर पाँच सरकारका मुख्यमन्त्री शंकर पोखरेल र चीनको कान्छु प्रदेशका गर्भनर थाङ रनच्यानविच भेटवार्ता भएको छ ।
बुधबार मुख्यमन्त्री तथा मन्त्रिपरिषद् कार्यालयमा भएको भेटवार्तामा मुख्यमन्त्री पोखरेलले प्रदेश ५ को विशेषता र संभावनाबारे जानकारी गराउँदै संघीयता कार्यान्वयनको एक वर्षमा आवधिक योजना र कानुन निर्माणलाई प्राथमिकता दिएको र योजनाबद्ध विकासको बाटो तय गरेको बताए।
गौतम बुद्धको जन्मस्थल लुम्बिनीसहित धेरै बौद्ध संस्कृतिसँग सम्बन्धित सम्पदास्थलहरू रहेको र ती क्षेत्रमा पर्यटन प्रवर्द्धन गरी लाभ लिने गरी योजना अघि सारिएको मुख्यमन्त्री पोखरेलले बताएका थिए ।
गभर्नर रनच्यानले प्रदेश ५ र बुद्ध जन्मस्थल लुम्बिनीको भ्रमण गर्न पाउँदा खुसी लागेको बताए।
उनले नेपाल र चीन बीचको सम्बन्ध निकै पुरानो र घनिष्ठ रहेको बताउँदै सम्बन्धलाई मजबुत र फराकिलो बनाएर द्विपक्षीय हितमा धेरै काम गर्न सकिने बताएका थिए।

द्विपक्षीय सहकार्यमार्फत् साँस्कृतिक तथा पर्यटन क्षेत्रमा धेरै गर्न सकिने उनको भनाइ थियो। उनले प्रदेश ५ को अवस्थाबारे मुख्यमन्त्रीबाट जानकारी पाएपछि प्रदेश ५ र कान्छु प्रदेशको अवस्था मिल्दोजुल्दो भएको बताए ।

त्यसैगरी उनले पर्यटन प्रवर्द्धनमा कान्छुको अनुभव यहाँ काम लाग्ने भएकाले द्विपक्षीय अनुभव आदानप्रदानलाई बढाउँदै लैजानुपर्ने बताए।
यसैगरी द्विपक्षीय सहयोग र साझेदारीका लागि समझदारीपत्रमा हस्ताक्षर भएको छ। मुख्यमन्त्री शंकर पोखरेल र गभर्नर थाङ रनच्यानको उपस्थितिमा उद्योग, पर्यटन, वन तथा वातावरण मन्त्रालयका सचिव धनञ्जय पौडेल र कान्छु प्रदेशका साँस्कृतिक तथा पर्यटन निर्देशक थन वइतोङले हस्ताक्षर गरी समझदारी पत्र आदानप्रदान गरेका थिए।