फेशन डिजाइनमा चम्कदै विलबहादुर थिङ

काठमाडौं- विलबहादुर थिङ नेपाली फेशन डिजाइनका क्षेत्रमा आफ्ना क्रियसनमार्फत धेरैको रोजाइमा रहन सफल नाम हो । काभ्रेको साविक डाडागाउ गाउँ विकास समिति हाल खानिखोला गाउँपालिका ३ का विलबहादुर काठमाडौंलाई कर्मथलो बनाएर आफ्ना क्रियशन पस्किरहनुभएको छ । बुबा हस्तबहादुर थिङ माता कालीमाया थिङको कोखबाट जन्मिनुभएका उहाँ विसं २०७६ सालदेखि यो क्षेत्रमा निरन्तर हुनुहुन्छ ।

फेशन डिजाइनमार्फत नेपाल र नेपालीको संस्कार र संस्कृतिलाई विश्वसामु चिनाउने आफ्नो ध्येय रहेको बताउनुहुने उहाँ सुरु सुरुका दिनमा केही गाह्रो भए पनि अहिले सहज हुँदै गएको सुनाउनुहुन्छ । सिक्दै, अध्ययन गर्दै आफू अघि बढिरहेको बताउनुहुने उहाँ यो क्षेत्रमा सधै नयाँ नयाँ क्रियशन पस्किनु चुनौती रहेको बताउनुहुन्छ । नेपालमा फेशनप्रति पछिल्लो समय चासो र रुचि बढ्दै गएको उहाँको बुझाइ छ ।