आहा–रारा गोल्डकप फुटबलको उपाधि संकटा क्लबले जित्यो

पोखरा – आहा–रारा गोल्डकप फुटबलको उपाधि संकटा क्लबले जितेको छ । पोखरा रंगशालामा शनिबार भएको फाइनल खेलमा अफ्रिकन रुट्स एशोसियसन डाउला क्यामरुनलाई टाइब्रेकरमा ४–२ को गोल अन्तरले पराजित गर्दै संकटाले पहिलो पटक आहा–राराको उपाधि चुमेको हो ।
१९ औं संस्करणको उपाधिसँगै संकटाले १० लाख १ हजार रुपैँया हात पारेको छ ।

निर्धारित र थप गरिएको समयमा पनि खेल १–१ गोलको बराबरीमा रोकिएपछि निर्णय पेनाल्टी सुटआउटमा लिइएको थियो । संकटाका अमित तामाङ, सुवास गुरुङ, निरज बस्नेत, आयुष घलानले गोल गर्दै संकटाका लागि पहिलो पटक आहा–रारामा इतिहास रचेका हुन् । अफ्रिकनका यानिक र रिमले गोल गर्दै खेल प्रतिस्पर्धामा गराएको भए पनि कुइटेको प्रहार खेर गयो भने संकटाका गोलकिपर राजाबाबु थापाले एमबाकोपको प्रहार छेक्न सफल भए ।
आहा–राराकै इतिहासमा पहिलो पटक फाइनलमा पुगेको संकटाले उपाधि नै उचाल्यो ।
पहिलो पटक सहभागिता जनाएको अफ्रिकन टोलीले उपविजेताका रुपमा ५ लाख रुपैयाँ हात पारेको छ ।

८ क्लबको सहभागिता रहेको प्रतियोगिताको च्याम्पियन संकटाका गोलकिपर राजाबाबु थापा उत्कृष्ट घोषित हुँदा संकटाकै नीरज बस्नेत उत्कृष्ट डिफेन्डर भए ।
यस्तै अफ्रिकन रुट्सका राफायल रिम उत्कृष्ट मिडफिल्डर हुँदा अफ्रिकन रुट्सकै बासिकले उत्कृष्ट स्ट्राइकर र उत्कृष्ट प्रशिक्षकको उपाधि पनि अफ्रिकन रुट्सका सेर्गी बोरिसले हात पारे । उनीहरुले जनही २५ हजार रुपैयाँ हात पारे ।