कम्युनिस्ट हारे भने लुटतन्त्र र त्रासबाट मुक्ति मिल्छ- देउवा

दाङ – प्रमुख प्रतिपक्ष दल नेपाली कांग्रेसका सभापति एंव पूर्वप्रधानमन्त्री शेरबहादुर देउवाले आशन्न उपनिर्वाचनमा सत्तारुढ नेकपा पराजित भए जनतालाई लुटतन्त्रबाट मुक्ति मिल्ने बताएका छन् ।
सोमबार दाङको श्रीगाँउमा आयोजित चुनावी सभालाई सम्बोधन गर्दै सभापति देउवाले आशन्न उपनिर्वाचनको जित-हारले सरकार बनाउने र ढाल्ने नभए पनि कांग्रेसले जिते सरकारको चेत खुल्ने बताए ।
“मैले भनिसके यो चेतावनी हुन्छ, यसले सरकार बदलिने, बनाउने होइन । तर, कम्युनिस्ट हारे भने लुटतन्त्र र त्रासबाट मुक्ति मिल्छ,” उनले भने । सभापति देउवाले कांग्रेसले जितेमात्रै दाङमा विकास हुने स्पष्ट पारे ।
“हाम्रो पार्टीले जितमात्रै दाङको विकास हुन्छ । नेपाली कांग्रेसलाई भोट हाल्नुस् । अझै रोजगार सिर्जना हुन्छ,” देउवाले भने । उनले प्रधानमन्त्री केपी शर्मा ओली राष्ट्रवादी नेता नभएको दोहो¥याए । सभापति देउवाले सत्तारुढ नेकपाले जनजाति, आदिवासीको नाममा भोटको राजनीतिक गरिरहेको पनि आरोप लगाए ।
“ओली राष्ट्रवादी हुँदै होइनन् । राष्ट्रवादको नाममा जनताबाट भोट लिए । जनजातिको नाममा भोट लिए,” देउवाले भने, “तर उनीहरुलाई कुनै अधिकार नै दिएको छैन ।” सभापति देउवाले आदिवासी, जनजाति, सिमान्तकृत, महिला मुस्लिम सबैलाई अधिकार दिएर कांग्रेसलाई सबैको पार्टी बनाएको बताए।