नेपाललाई यू–१५ महिला साफको उपाधि

काठमाडौं – नेपालले शुक्रबार घरेलु टिम बंगलादेशलाई १–१ को बराबरीमा रोकेसँगै यू–१५ महिला साफ च्याम्पियनसिपको उपाधि जितेको छ । ढाकामा सम्पन्न खेलको अन्तिम मिनेटमा घरेलु टिम बंगलादेशले पाएको पेनाल्टी नेपालकी गोलकिपर सुजता तामाङले बचाएपछि नेपालले उपाधि उचालेको हो । त्यसअघि नेपालले खेलको १४ औँ मिनेटमा सुशिला केसीले गरेको गोलबाट अग्रता बनाएको थियो । तर, ५४ औँ मिनेटमा रुमा अख्तरको गोलमा बंगलादेश खेलमा फर्किएको थियो ।

जितसँगै डबल राउन्ड रोबिन पद्धतिमा भएको प्रतियोगितामा नेपालले १० अंक जोडेको छ । यसअघि नेपालले पहिलो खेलमा भुटानलाई ७–० ले, दोस्रो खेलमा बंगलादेशलाई १–० ले तेस्रो खेलमा भुटानमाथि पुनः १–० को जित निकालेको थियो ।

उपाधिसँगै नेपालकी गोलकिपर सुजाता प्रतियोगिताको सर्वोत्कृष्ट गोलकिपर घोषित भइन् । ‘फेयर प्ले अवार्ड’ बंगलादेशले जित्दा नौ गोलसहित बंगलादेशकै सौरभी अकान्डा प्रिति उच्च गोलकर्ता बनिन् । सौरभी नै प्रतियोगिताको सर्वोत्कृष्ट खेलाडी चुनिइन् ।