ऐतिहासिक टोखा बजारको विकासमा कांग्रेसले जनायो यस्तो प्रतिबद्धता

काठमाडौं– नेपाली कांग्रेसले टोखा नगरपालिकाको वडा नं. २ र ३ लाई समेटेर अलगै प्रतिबद्धता पत्र जारी गरेको छ । टोखा नगरको सांस्कृतिक एंव पुरातात्वीक शहर लक्षित कार्यक्रममा त्यहाँ संस्कृति र सभ्यतालाई समेटिएको छ । प्राचिन धरोहरको संरक्षण, परम्परागत मौलिक शैलीका घरहरुको निर्माण, टोखाको चाकुको आधुनिकरण र बजार विस्तार, नेवारी भाषा र रञ्जना लिपीको संरक्षण जस्ता विषय कांग्रेसले आफ्नो प्रतिबद्धता पत्रमा समेटेको छ ।
कांग्रेसबाट टोखा नगरपालिकामा मेयरमा रजनी थापा र उपमेयरमा मुरारी तामाङ तथा वडा २ अध्यक्षमा रवि डंगोल (माइला) र वडा ३ मा रमेश जोशीसहितको टिम चुनावी मैदानमा छन् ।

यस्तो छ विशेष प्रतिबद्धता पत्र

१, टोखा प्राचिन, पुुरातत्वीक र सांस्कृतिक शहर मात्र होइन सभ्यता पनि हो ।
२, यहि ऐतिहासिक शहरको नामबाट टोखा नगरपालिका नामाकरण हुनु हामी सबै नगरबासीको गौरव हो ।
३, टोखाको मौलिक जीवन शैली, खानपान, संस्कृति भेषभुषा र रिती रिवाजको संरक्षण र सम्बर्धन गर्नु हाम्रो कर्तव्य हो ।
४, काठमाडौं उपत्यकाका आदीवासी नेवार सभ्यताको प्रतिकका रुपमा रहेको टोखा बजारको मौलिक विकासका लागि हामी प्रतिबद्ध छौं ।
५,नेवारी भाषा र रञ्जना लिपीको संरक्षणमा विशेष कार्यक्रम लागु गर्नुका साथै नेवारी भाषा र रञ्जना लिपीलाई नगरको कामकाजको भाषाको रुपमा मान्यता दिइनेछ । नगरको लेटरहेडमै रञ्जना लिपी प्रयोग गर्ने प्रतिबद्धता प्रकट गर्दछौ ।
६, टोखा शहरको ऐतिहासिक पहिचान, सभ्यता, भेषभुषा, जीवन पद्धतीलाई जीवन्त राख्न संग्राहलयको अवधारणा लागु गरिने छ ।
७, सामान्य ज्ञानमा समेत उल्लेख भएको टोखाको चाकुलाई ‘ब्राण्डिङ’ गरी राष्ट्रिय तथा अन्तराष्ट्रिय बजारसम्म पु¥याउन विशेष कार्यक्रम लागु गरिने छ ।
८, ऐतिहासिक टोखा बजारमा मौलिक नेपाली शैलीको घर निर्माणलाई प्रोत्साहन गरी नक्सा पास लगाएतका कार्यमा छुट व्यवस्था गरी अन्य आर्थिक र प्राविधिक सहयोग उपलब्ध गराइने छ ।