कांग्रेसमा उपनिर्वाचनका लागि उम्मेदवार तय गर्ने जिम्मा पदाधिकारीलाई

काठमाडौं – प्रमुख प्रतिपक्ष दल नेपाली कांग्रेसले मंसिरमा हुने उपनिर्वाचनका लागि पार्टीका तर्फबाट उमेदवारको टुंगो लगाउने जिम्मा पदाधिकारीलाई दिएको छ । शुक्रबार बसेको केन्द्रीय कार्यसमिति बैठकले उमेदवारको टुंगो लगाउने जिम्मा पदाधिकारीलाई दिएको हो ।
कांग्रेस प्रवक्ता विश्वप्रकाश शर्माले मंसिर १४ गते हुन गइरहेको उपनिर्वाचनका लागि पार्टीकातर्फबाट उमेदवारको टुंगो लगाउने जिम्मेवारी पदाधिकारीलाई दिने निर्णय गरिएको जानकारी दिए । उमेदवार चयनका लागि बस्ने पदाधिकारी बैठकमा वरिष्ठ नेता रामचन्द्र पौडेल र पूर्वमहामन्त्री कृष्णप्रसाद सिटौलालाई आमन्त्रित सदस्यका रुपमा सहभागी गराइने पनि कांग्रेसले निर्णय गरेको छ ।
कांग्रेसले उपनिर्वाचनका लागि आगामी आइतबारसम्म उमेदवारको चयन गरिसक्ने तयारी गरेको छ ।